مقارنه للمبات أضائه السيارات المختلفه.

السلام عليكم ورحمه الله وبركاته

النهاردة حنعمل مقارنه بين انواع اللمبات المختلفه وعيوب ومميزات كل لمبه علشان نختار اللي يناسبنا.

كل اللمبات اللي حيتم شرحها تحت الهدف منها تحسين اضاءة السيارة بدون تعديل في السيارة وتركيب زينون لكن اكيد قوة اضاءة الزينون حتبقي احسن واللي يقولك ان فيه لمبة هالوجين تضئ بقوة الزينون يبقي بيضحك عليك وكمان حاجة لما بقول زينون بيبقي قصدي زينون اصلي او نوعية صيني جيدة متجربة لأن فيه نوعيات زينون اللمبة البطيخة العادية بتاعت زمان احسن منها في الاضاءة والعمر الافتراضي

حاجة اخيرة اللي بقوله ده مش بدافع البيع والتجارة ولكن والله يعلم ذلك ما هي الا مجرد معلومات عندي جايز يستفاد بيها حد في اتخاذ القرار في حالة انه عاوز يحسن اضاءة سيارته.

نبدأ بأسم الله:

اولا مقاس اللمبات الخاصه بالنوبيرا:

لمبه الفوج

(Fog Light)

لمبه مقاس H3

الفانوس العادي

لمبه واحدة عالي وواطي مقاس H4

الفانوس العدسات

لمبه العالي مقاس H1

لمبه الواطي مقاس H1

---

ثانيا انواع اللمبات المختلفه

تونجسترام صناعه مجري

معلوماتي عنها قليله بس هي 100/140 وات وتحتاج كتاوت .. بس رأيي الشخصي منصحش بيها لأن عمرها قصير مقارنه بالفيليبس رالي.

شركه فيليبس

Philips Rally H4 12V 100/90W - فيليبس رالي

هي اقوي لمبة فيليبس موجودة من حيث القوة وشدة الاضاءة وده عشان اللمبة ديه بيجي قوة الوات بتاعها ضعف اللمبات الفابريقة للسيارة فعادة لمبات فابريقة السيارات وخصوصا الحديثة منها بقت بتيجي 55 وات وده الوات المسموح بيه في الدول الاوربية حاليا لانه اقصي وات ممكن يدي اضاءة قوية دون احداث ضرر او مشاكل لسائقين السيارات المقابلة.

واللمبات الرالي بيسموها في اوربا لمبات (off road) وده لانها غير مسموح بيها علي الطرق ولكن يمكن استخدامها فقط في المناطق الجبلية والصحراوية ومن هنا جاءت التسمية بفيليبس رالي

الفيليبس رالي بتدي اضاءة قوية لكن مش مركزة امام السائق بمعني انها بتنتشر اضاءتها في كل الاتجاهات وده عشان تفي بالغرض الاصلي منها وهو ان السيارة في الجبل او الصحراء مش بتبقي ماشية بسرعة فا مش محتاج طول اضاءة لمسافة بعيدة امام السيارة ولكن بيبقي محتاج قوة اضاءة في كل الاتجاهات ولذلك فاضاءتها مبعثرة.

وده بيخلي اللي جاي في مقابل الفيليبس رالي يحس بنور قوي جدا امامه وانت بردوا وانت راكب جوا العربية حتحس باضاءة قويه لو انت في شارع في المدينة لكن لما تطلع علي طريق صحراوي مثلا حتلاقي ان الاضاءة مش راميه امامك علي الطريق لمسافة بعيدة زي اللمبات الاخري زي الاكستريم مثلا

امتي تكون مفيدة:

1- اللمبات اللي راكبه عندك اصلا 100 وات

2- اللمبات اللي راكبه عندك 55 وات بس انت معندكشي مانع تعدل في كهربة السيارة وتركب كتاوت

امتي لا تكون مفيدة:

1- اللمبات اللي راكبة عندك 55 وات ومش عاوز تعدل في كهربة العربية لانك لو ركبتها من غير ما تركب كتاوت وتعدل سلك ضفيرة اللمبات لسلك اقوي ده ممكن يسخن دراع النور وممكن يتلف الضفيرة.

2- الفوانيس اللي راكبة عندك مش اصلية لانها ممكن تسيح او تغير لون الفوانيس للون الاصفر وده عشان فيليبس رالي بتتنتج حرارة مضاعفة عن اللمبات الاخري نظرا لشدة اضاءتها

لمبات فيليبس اكستريم فيجن – Philips X-treme Vision

هي اخر اختراع من فيليبس في مجال اللمبات الهالوجين حتي الان.

فيليبس قدمت مفهوم جديد في الاكستريم فيجن وهو ان اللمبة بتستهلك كهرباء نفس استهلاك اللمبات الاستاندر (55 وات) لكن بتطلع اضاءة مضاعفة توازي اضاءة الفيليبس رالي وعشان كده علبة اللمبات مكتوب عليها 100% اضاءة اضافية وده عن طريق انهم غيروا نوع الغاز المستخدم داخل اللمبة وخلوه غاز زينون وده نتج عنه ان اللمبة اضاءتها بقت اقوي لكن بنفس استهلاك الكهرباء وفي نفس الوقت الحرارة الناتجة نفس الحرارة الناتجة عن اللمبات الاستاندر لان الزينون بطبعه مش بينتج حرارة عالية

في نفس الوقت عدلوا في الرأس الامامي للمبة وخلوا عليها ما يسمي بالفلاتر (طبقة زرقاء علي اول اللمبة) وده دوره انه يمنع تشتت الضوء ويخليه مركز امام السائق وعشان كده اللمبات ديه بتطلع طول اضاءة بيوصل في بعض السيارات لي 35 متر ( بيختلف طول الاضاءة من سيارة لسيارة نتيجة شكل السطح العاكس وجودته وايضا جودة الزجاج الامامي للفوانيس).

ايضا الطبقة الزرقاء اللي علي رأس اللمبة ادت ان اللمبات ديه بقت تتنتج لون اضاءة ابيض (مش ابيض بالظبط زي الزينون لكن ابيض بنسبة مقارنة بلون اللمبات الاستاندراللي بيبقي لونها اصفر).

امتي تكون مفيدة:

1- اللمبات اللي راكبة عندك اصلا 55 وات ومش عاوز تعدل اي حاجة في كهربة السيارة نظرا للضمان او كمبيوتر السيارة ممكن يطلع خطأ او من الاصل خايف من الكهربائية ولعبهم في العربية

2- خايف علي الفوانيس اللي عندك من الحرارة الزيادة

3- عاوز طول اضاءة علي الطريق

4- خايف ان استهلاك الكهرباء الزيادة يؤثر علي بطارية السيارة

امتي لا تكون مفيدة:

1- اللمبات اللي راكبة عندك 100 وات لان في الوقت ده مش حتحس بأي فرق لو ركبت اللمبات ديه

2- العربية عندك موديل قديم ومتركب فيها كتاوت نور او ما عندكش مانع انك تعدل في الكهربة فيستحسن انك تركب رالي وتوفر في السعر لان الرالي اقل ثمنا من الاكستريم فيجن

فيليبس نايت جايد – Philips Night Guide

الفيليبس نايت جايد ده اختراع تاني من فيليبس. النايت جايد ممكن نقول انها لمبة ممكن تركبها لو انت النور عندك كويس بس بردوا عاوز تحسنوا شويه لانها بتدي 50% اضاءة اضافية يعني لو اللمبة 55 وات فهي بتضئ اضاءة ال 75 وات

الفيليبس نايت جايد فيها ميزة تانية انها بتضئ 3 الوان اضاءة امام السائق اصفر وابيض وابيض مزرق (اكيد مش حتلاقي الالوان ديه واضحة قوي زي الوان الطيف امام السيارة لكن لما تركز في الاضاءة حتحس ان ناحية اليمين النور ابيض بينما ناحية الشمال النور اصفر) وده فيليبس بتقول انه بيوضح للسائق العلامات الارشادية اللي علي اليمين ويقلل الوهج بتاع اضاءة السيارات المقابلة وبيزيد من تركيز السائق اثناء القيادة

امتي لا تكون مفيدة:

1- ضوء الاضاءة عندك كويس انت راضي بيه بس معندكشي مانع تحسنه شوية

2- نفس ميزة الاكستريم فيجن انها لاتحتاج اي تعديل في كهربة السيارة لانها 55 وات

امتي لا تكون مفيدة:

لما تبقي حاسس انك عاوز اكتر من مجرد تحسين بسيط في الاضاءة عشان ما تشتريش لمبات وبعد كده تحس ان مش هي ديه اللي انت عاوزها

---

فيليبس كريستال فيجن – Philips Crystal Vision

فيليبس كريستال فيجن هي لمبات فيليبس نورها ابيض صافي (لامع) طبعا كشكل اضاءة ديه من احلي اشكال الاضاءة اللي ممكن تبقي عاوز تشوفها في عربيتك.

الكريستال فيجن بتضئ شكل اضاءة حلو قوي واي حد بيقف امام السيارة حيشوف فوانيس شكلها حلو بس بالنسبة للسائق خصوصا في الطرق السريعة حيحس ان الاضاءة مش حلوه قوي امامه

الكريستال فيجن لون اضاءة لكن مفيهاش قوة اضاءة اعلي من الاستاندر زي الاكستريم فيجن (100% اضاءة اضافية) و النايت جايد (50% اضاءة اضافية) يعني اضاءة الكريستال فيجن هي هي اضاءة اللمبات الاستاندر 55 وات بس بي لون اضاءة مختلف

امتي تكون مفيدة:

1- لما تبقي مش عاوز اضاءة اضافية وقوة الاضاءة عاجباك بس عاوز لون اضاءة ابيض زي الزينون

2- لما بتبقي اغلبية سواقتك داخل البلد مش علي طرق سريعة كتير

امتي لا تكون مفيدة:

1 – لما تبقي عاوز قوة اضاءة بغض النظر عن لون الاضاءة

---

فيليبس دايموند فيجن Philips Diamond Vision

الفيليبس دايموند فيجن ممكن نقول عليها نفس الكلام اللي قولناه علي الفيليبس الكريستال فيجن مع اختلاف واحد وهو ان لون اضاءة الدايموند فيجن ابيض تلجي مش ابيض صافي في ماعدا ذلك كل المواصفات والشرح السابق ينطبق عليها.

شركه اوسرام

OSRAM Night Breaker Unlimited 60/55W 12V

· اخر ابتكارات شركة اوزرام الالمانية واقواها علي الاطلاق حتي الان

· لمبة اضاءة امامية هالوجين اوزرام - 3 ريشه - 110% اضاءة اضافية

· طول اضاءة علي الطريق يصل لي 35 متر

· اضاءة ابيض من اللمبات الاستاندر بمعدل 20% (درجة لون تصل لي 4000 كليفن)

· صناعة المانية

· الضوء الامثل لزيادة وقت رد الفعل

· تتميز بالخطوط الزرقاء والتي تقلل من الوهج المنعكس

· تتنتج اضاءة اكثر كفاءة وذلك بفضل الصيغة المثالية للغاز المستخدم

· تصميم لافت للنظر مع اللفائف الزرقاء والكاب الفضي

· 110% more light

· 40 Meter distance

· 20% whiter light

المواصفات التقنيه:

لمبات
قدرة الوات	60/55
قدرة اضاءة اضافية	110%
درجة اللون	درجة لون ابيض من اللمبات الاستاندرد بنسبة 20 في المائة
طول اضاءة	طول اضاءة يصل لي 35 متر
تحتاج كتاوت	لا تحتاج كتاوت اي تعديل