طريقه ضبط ارتفاع الاضائه للفوانيس H4 (العاديه)

السلام عليكم ورحمه الله وبركاته

اولا الصور المرفقه من علي النت واستخدمتها لتوضيح الطريقه مع الحفاظ علي حقوق الملكيه لصاحبها
ثانيا الناس اللي ملعبتش في الفوانيش او مغيرتش لمبات متعدلش علي ضبط المصنع لأن عمرك ما حتظبطها افضل منه
---طبعا الكل عارف ان الإضاءة الأمامية من اهم اساسيات السيارة وممكن تخلى القياده ليلا جحيم او جنه والأهم من اللمبات هو ضبط الفانوس نفسه فى ناس كتييير مركبه زينون ومش مستمتعه بيه لعدم الوصول للضبط المثالى للفوانيس والفكرة مش لما الفانوس يعلى يبقى هيدى اضاءه افضل ,,,
---

قبل ما ندخل فى الموضوع لازم ناخد بالنا من الأتى 
- كاوتش العربية لازم يكون متظبط كويس لا نايم ولا زياده
- تانك البنزين يفضل انه يكون نصه مليان مش فاضى او متفول
- طبعا شنطه العربية تكون فاضيه

احنا محتاجين : 

- حيطه مستويه 

- أرضيه مستويه مش مايله ويفضل مش يكون فيها تعوجات

- مفك للمسمار اللى بيعلى ويوطى النور

- طباشير 

- متر للقياس 

- كشاف صغير علشان ننور لنفسنا واحنا بنضبط النور

---

:ودلوقتى نيجى للطريقهاولا بسم الله الرحمن الرحيم 
- طبعا كل فانوس فيه مفتاحين واحد بيحرك الفانوس لفوق وتحت والتانى بيحرك الفانوس يمين وشمال لازم نعرف اماكنهم قبل
عمليه الضبط

 نجيب العربية قدام الحيطه ونقربها خالص من الحيطه ونور النور وبعدبن نرسم نقطه فى منتصف النور اللى على الحيط  مع مراعاة ان النقطه تكون قدام اللمبه بالظبط ونسميها مثلا النقطه  A و بكده احنا عندنا نقتطين A فى نفس المستوى نرسم خطين واحد بالعرض وواحد بالطول زى الصوره.

- نرجع العربية مسافة من 7 - 10 متر بس ناخد بالنا لازم المسافة تكون محسوبه كويس ( هنقيسها بالمتر من الفانوس وليس من الكاوتش ) ولازم واحنا بنرجع العربيه تكون فى خط مستقيم ودى مهمه جدا علشان الإتجاهات
- نيجى لأهم نقطه هنفتح الكابوت هنلاقى على الفانوس رقم زى 1.2% أو 1.0% او 1.3% وهكذا ... الرقم ده مهم جدا وبيختلف من عربيه للتانيه .. المهم نضرب الرقم ده فى المسافه اللى العربية رجعتها .. مثال : احنا نفرض اننا رجعنا العربية 8 متر والرقم بتاع الفانوس كان 1.2% يبقى 8 × 1.2 = 9.6 سم نقول 10 سم تقريبا 
- نرجع تانى للحيطه ونرسم نقطه تحت النقطة A ب 10 سم ( ده الرقم اللى احنا حسبناه فوق ) ونسمى النقطه دة B بشرط انها تكون فى نفس الخط الطولى المار بالنقطه A 
- نرسم خط تانى بالعرض موازى مار بالنقطتين B وموازى للخط العرضى المار بالنقطتين B زى الصورة

- نلاحظ ان لازم الخط الأخضر يكون متزن يعنى مش مايل من ناحية ويكون ال كت اوف Cutoff  لكل فانوس فى نفس المستوى ويعنى مش لازم يكون الفانوس اليمين أعلى من الشمال علشان المقابل زى ماهو معتقد عند البعض لأن كما ملاحظ ان الكت اوف Cutoff بتاع النور أعلى من جهة اليمين بالتالى هو اقل من جهة الشمال والعكس فى العربيات المزوده بدريكسيون يمين وبالتالى انا بأنصح اى حد يجيب فانوس استيراد يخلى باله من النقطه دى لو لقى العربيه دريكسيون يمين مش يجيبه لأن هيلاقى النور أقوى من الشمال وضعيف فى اليمين وبالتالى مش هيشوف يمين الطريق كويس وهيسبب أذى كبير للمقابل.


- دى نتيجه ضبط النور

لاحظ الأتى :

- انا كلامى كله عن النور الواطى لأن بمجرد ضبط النور الواطى العالى بيتضبط لوحده 

-  لما نضبط النور على الرقم اللى موجود على الفانوس ( 10سم كما فى المثال ) ممكن تحس ان النور لسه عالى وتوطيه شويه حوالى 5 سم كمان علشان المقابل 
- الزينون لازم نوطى الفانوس كمان شويه علشان نسبه اللإضاءه أقوى علشان  ميأذيش حد 

كده احنا خلصنا ويارب الموضوع يكون عجبكم ومفيد لكم 
والسلام عليكم ورحمة الله وبركاته