الفتيس الاوتوماتك الواير

   Samy Moustafa 

&

Mohamed Hamza

الفتيس الواير اولا هو مش مصري..يعني اللي مصنعه شركة دايو مش مصر..كلمة مصري علشان العربيات كانت تقفيل مصري... فتيس ناس كتير فكراه وحش مع انه فتيس كويس...الناس بتعامله وحش وبعدين ترجع تقول فتيس زي الزفت...عموما المصريين خبرتهم ضعيفة بالاتوماتيك..ولغاية دلوقتي عادي اوي لما تسمع واحد معاه عربية اتوماتيك ويقولك انا عمري ما غيرت زيت فتيس قبل كده..انا بزوده بس !!! ميزته انه صيانته سهلة جدا...وليه مقياس زيت يعني سهل تعرف تكشف عن الزيت كل شوية...سهل جدا تغيير او تنضيف الفلتر بتاعه...تسارعه متوسط...وهادي في نقلاته...سهل تغيير علبة البلوف بتاعته (عقل الفتيس اللي بيحل محله كارت الكنترول في الفتيس الكهربا ... غيار زيته مش كتير زي بعض انواع الفتيس اللي ممكن تاخد 6 و 8 لتر...بياخد 3 لتر الا ربع فقط ( طبعا ده مش كل الزيت اللي جواه بيكون متبقي جواه حوالي 3 لتر كمان)...عيوبه : واير الكيك محتاج ظبط صح علشان ينقل في ميعاده...لكن ده عيب وميزة...لو انت من الناس اللي بتحب تشبع (تحرق) الغيار تقدر تشده وهو حيقوم بالباقي...طريقة دخول الواير في الفتيس مش عملية تماما (قمع بلاستيك) وبالتالي معرض جدا للكسر اما بسبب تحريك الواير او السخونة ...ووقت ما بيتكسر غالبا بتبدأ معاناة الناس لانها مش بتعرف انه مكسور ويبتدي الفتيس يدخل جواه تراب ومياه وده اكتر حاجة بتبوظ الفتيس... مفيهوش كنترول كهربا وبالتالي مش زي الفتيس الكهربا تعرف تكشف عن اعطاله بالكومبيوتر...مشاكله غالبا متعلقة بعلبة البلوف وده يا اما تأخير في غيار الزيت او دخول تراب جواه او دخول مياه...ودخول المياه جواه من الحاجات المؤذية ليه جدا...بتدخل اما من القمع البلاستيك لكابل الكيك او بسبب خرم في مواسير الردياتير....اعطال الميكانيكا بتاعته غالبا بتكون في الكلتشات ....سعره رخيص من 1200 لغاية 1600...لا يحبذ تصليحه اذا كانت مشاكله متعلقة بالتروس او كلتشات كتير ...وسهل جدا تصليحه في حالة اعطال علبة البلوف او رينجات منظم الزيت الداخلي...للمحافظة عليه الصيانة الصح..زيت نوع نضيف يتغير كل 20 الف...تغيير فلتر زيت او تنضيفه كل غيار زيت...سواقة طبيعية مش قرص عمال على بطال ...عدم،استخدام الكيك داون كتير ...اجمالا فتيس محترم ومظلوم بسبب سوء استخدام الناس...فيه ناس كتير بتصلحه 

ازاى اعرف الفتيس الواير ؟

1- ملهوش ازرار Power & Hold

2- هتلاقى على بكرة الاكسلاتير 2 واير واحد لدواسة البنزين الواير اللى فوق الواير اللى تحت بتاع الفتيس (Kick Dowen)

3- له مقياس زيت بقبضة حمرا جنب مقياس زيت الماكنة

الواير الخاص بالفتيس كابل ال Kick Dowen

 

عصاية الفتيس بدون ازرار ال PWER & HOLD

 المقياس الاحمر لقياس زيت الفتيس

طريقة قياس مستوى الزيت حسب الكتالوج (الخدمة و الصيانة 6-9)

1- لازم تكون العربية على ارض مستوية.

2- هات الفتيس على P.

3- هتطلع المقياس و تمسحه بمنديل او قطعة قماش و تحطه تانى  و تسحبه.

4- لازم يكون الزيت بين العلامتين Hot و 80 درجة مئوية.

5- هتفحص كل 20.000 كم و تغير كل 40.000 كم.

6- لو اللون متغير هتغير زيت و فلتر مع بعض بياخد 2.5 لتر.

***  تحذير الجزء ده محدش هيتحمل مسئوليته غير حضرتك   لو عملته بنفسك

طريقة تغير الفلتر

1- ترفع العربية وتنزل تحتها.

2- تفك الكارتيرة 12 مسمار نجمة...وتستنى الزيت ينزل.

3- بعدين تفك غطا الفلتر 10 مسامير نجمة.

طبعا اللي بيفك لازم يكون عارف الغطا من علبة البلوف بدل ما يفك علبة البلوف بالغلط....ده بالظبط طريقة تغييره ...في ناس بتستصعبها وناس بالنسبالها سهلة  

دى علبة البلوف الفضى المكان اللى متعلم عليه بالاحمر مكان الفلتر