الموتور متلت يعنى ايه ؟ و الحل

Alkady Da Ana

مؤسس الجروب :

موضوع مهم جدا للناس كلها عشان يبقى عندها فكره بموضوع ان الموتور متلت
عيوب دوران الموتور 3 بوجيه ( متلت )
ان سبيكه البستم اللى مش شغال بيحصل فيها تاكل اسرع نتيجه دورانها معتمده على حركه عمود الكرنك
وليس نتيجه شوط السحب والاحتراق
انما من حيث سبب دوران الموتور 3 بوجيه ( متلت )
فدا
اولا بيكون بوجيه قاطع ودا بيرجع لعده اسباب
1- ان سلك البوجيه مش راكب فى البوجيه كويس او فى الموبينه
2- البوجيه نتيجه لاستخدامه لفتره طويله اصبحت شرارته ضعيفه
3- وجود اثار زيت على شمعه البوجيه أدت لعدم عمل البوجيه
4- رداءه سلوك البوجيهات
الكلام دا ينطبق على العربيات الكربراتير والانجكشين بشكل عام دون تمييز بين اى موديلات او انواع
انما فى الانجكشين فى سببين كمان بيخلى العربية تدور 3 بوجيه ( متلته )
رغم سلامه سلوك البوجيهات وجوده التوصيل والبوجيهات تعمل وفى حالة جيده
والسبب الاول
ان الموبينه خصوصا لو كانت مدمجه يعنى خارج منها 4 سلوك للبوجيهات
ممكن تكون قاطعه خط من ال 4 دول ومخليه العربية متلته
او السبب التانى
وهو ان فى رشاش من الرشاشات ال 4 المتوصله على غرف الاحتراق فيه خلل وانه قطع معدتش بيرش بنزين
ودا كفيل بانه يخلى العربية تدور 3 بوجيه كأن فى بوجيه قاطع
كدا شرحنا المشكله واسباب المشكله
نيجى لحل ودا الاهم ان الكل يعرفه
اول ما حضرتك بتدور العربية وغالبا بيحصل موضوع ان العربية تدور متلته الصبح
حضرتك هتفتح الكابوت بتاع العربية وبفوطه ناشفه
تبدأ تشد سلك البوجيه الاول بمعنى انك تفصله لو كان البوجيه دا شغال بكفاءه هتلاقى ان الموتور اتبرجل اكتر
طيب لو هو السبب هتلاقى مفيش تغيير فى الموتور فى حالة التوصيل او الفصل
وهكذا لحد ما توصل للبوجيه اللى فاصل او بمعنى اصح البستم اللى مش شغال
بافتراض ان البستم التانى هو اللى فى المشكله
بمفتاح البوجيه هنفك البوجيه
ونشوف البوجيه دا ونصفرنه كويس ونركبه تانى
ونوصل السلك بتاعه كويس تانى وندور العربية ظبطت يبقى تمام
لسه مبرجله
هنعمل حركه هنفك البوجيه دا تانى ونفك اى بوجيه تانى
ونبدل البوجيهات مكان بعض ونركب سلوك البوجيهات بنفس الترتيب تانى
وندور العربية تانى
ظبطت يبقى تمام
لسه مبرجله نتأكد من سلامه البوجيه الى كان بايظ اصلا وصنفرنه بنفس الطريقه باننا نشد
السلك اللى راكب اللى فيه لو الموتور اتبرجل اكتر يبقى كدا شغال وتمام
لو متأثرش يبقى هو بايظ لسه
وكدا محتاجين طقم بوجيهات جديد او على الاقل بوجيه واحد جديد
طيب افرض انه شغال
هنا قدامنا
سببين للمشكله اللى احنا فيها دى
وهى ان الموبينه قاطعه خط او سلك البوجيه تعبان
والسبب التانى
الرشاش قاطع
نيجى نشوف حل السبب الاول وان الموبينه قاطعه خط او سلك البوجيه تعبان
هنجرب بسلك قديم عندنا نوصله من الموبينه للبوجيه اللى فى البستم القاطع
طيب افتراضا
اننا معدناش سلك نجرب بيه
هنشيل السلك بتاع البستم اللى مش شغال
الاول من عند البوجيه وبعدين من عند الموبينه
ونشيل اى سلك من الموبينه ونحط السلك دا مكانه
وقبل ما ننسى نركب السلك دا فى البوجيه اللى كان راكب فيه السلك اللى شلناه من الموبينه حالا
وكدا هيبقى معانا سلك هنوصله للبوجيه اللى مش شغال وفى الموبينه
وندور العربية ونشوف
البوجيه اللى مش شغال لما نفصل السلك عنه المكنه بتبرجل ولا لا
افتراضا انها برجلت يبقى كدا اشتغل
طيب نشوف البوجيه اللى خدنا السلك بتاعه نجرب بيه وركبنا عليه السلك القديم
لو شغال هو كمان يبقى الامور ظبطت والدنيا زى الفل
طيب البوجيه دا فصل
يبقى كدا السلك دا اللى فيه المشكله ومحتاجين طقم سلوك بوجيهات جديد
او سلك على الاقل
طيب
افرض اننا جربنا بعد حوار تبديل السلوك ولسه البوجيه اللى قاطع قاطع
ساعتها هنبطل العربية وهنجيب مفك طويل وتكون ايده سليمه وتغطى ايدك اللى هتمسك المفك بفوطه
او البس جوانتى سيفتى لو عندك يبقى تمام
هتشد السلك اللى داخل لللبوجيه دا وتدخل المفك فى الفتحه بتاعته وتلمس جسم المفك المعدن فى الموتور
لو شرز يبقى واصل له كهربا وكدا الموبينه شغاله ال 4 خطوط والسلك سليم
ويبقى كدا العيب قطعا فى رشاش البستم دا قاطع
طيب لو لمست المفك فى جسم الموتور المعدن ومعملش شرز خالص
يبقى الموبينه قاطعه الخط دا ومحتاجين موبينه جديده او استعمال
وكدا يبقى شرحنا اسباب ان العربية تدور 3 بوجيه ( متلته )
وكيفيه اكتشاف البوجيه الفاصل
وكيفيه علاج المشكله
اتمنى يكون عرضى للموضوع تم بشكل موفق
وتحت امركم فى اى استفسار

‏