ثيرموستات الكوعه المفتري عليه

Khaled Kasem

يا جماعه. كان من واجبي وتخصصي الدراسي اني انقل لكم الحدوته دي فمتزهقوش مني معلش اقرئوها كامله خلصنا بقه من ميه التبريد نتكلم بقه بالراحه وبالعقل وبالمنطق شويتين عن ثرومستات الكوعه المفتري عليه ما له وما عليه باختصار شديد اي موتور عربيه لازم يوصل لدرجه حرارة معينه بتتراوح ما بين 80 الي 92 درجه سليز علشان يشتغل بكل كفاءة ويطلع قدرته والبور هورس مظبوط. ودي بنسميها الكفايه الحرارية او بالفلاحي كده المناخ المعتدل اللي الموتور بيتقالم معاه وبيطلع كل قدارته المصمم عليها مسبقا زي البني آدم كده بيبقي سعيد جداااااااااااااااااااااا لوعاش في درجه حراره جويه تحت ال25 درجه سليز يعني لا حر ولا برد زي اليومين دول كده لا بيحتاج بطانيه ولا مروحه وتكييف صح جو معتدل جدا جداااااااااااااااااااااا لجسم الانسان طيب جميل قوي يعني نفهم من التشبيه ده ان الانسان بيحب ومبيبذلش اي مجهود علشان يتكيف مع درجه الحرارة المعتدله دي طيب لو درجه الحراره زادت بيلجأ للمبردات فورا مراوح تكيييفات تلاجات وخلافه والعكس برده لو قلت بطاطين ودفايه وخلافه. يعني ييعمل احتياطاته علشان ييحاول يرجع درجه الحرارة اللي بيتمناها اللي هيه 25 درجه مثلا نفس الكلام للموتور درجه حرارته -المناسبه زي ما قلنا بتتراوح ما بين 80 و92 حسب المصمم ونوع خامات اللي متصنع بيها الموتور. اللي بيحافظ علي درجه حرارة الموتور ثابته مبتنزلش ولا تزيد هو هذه القطعة المفتري عليها الثرومستات. وبتاع النوبيرا مظبوط علي 87 درجه ومكتوب عليه كمان اول ما درجه حراره الميه بتوصل الي هذا الرقم بيقوم الياي شادد الطبق النحاس الي اسفل وفاتح للميه اللي قربت تغلي علشان تخش علي سربنتينه الريداتير وتتبرد وترجع القربه وتخش الموتور من تاني في تناغم وسلاسه محسوبه بالمللي. وتستمر الدورا واللي بيساعد الميه في تبريده بسرعه هيه شغله المراوح اللي متوصله بساعه حراره لا تعمل حتي وصول درجه حراره وش السلندر عند نفس الدرجه
كده بنضمن حاله حراريه منتظمه وثابته وجيدة جدا ومناسبه قوووووووووووووي للموتور سواء العربيه ماشيه بتجري او واقفه سلانسيه. وكل اجزاء الموتور تقريبا بقول تقريبا نفس درجه الحرارة المثاليه فيعمل بكل كفاءة و راحه
طيب لو الثرومستات متشال ايه اللي بيحصل ببساطه الموتور بيبذل مجهود كبير علشان يعمل لنفسه درجه الحرارة اللي بيتمناها وهي 87 مثلا. ومبيقدرش يحصل عليها بسهوله وخصوصا لو الجو الخارجي برد قاسي. فالي بيحصل بيدور وهو بارد ودايما بتفضل اجزاء في المحرك ابرد من اجزاء بصفه مستمرة اجزاء وصلت لدرجه حرارة مناسبه واللي هيه مثلا اللي قريبه للكوعه اللي من غير ثرومستات واجزاء اخري عند جهه الموبينه ابرد نسبيا. تخيل انت بقه حضرتك انت مسخن جزء معدن علي النار باستمرار وجزء تاني بعيد شويه علي النار تفتكر حضرتك ايه ممكن يحصل لمعدن زي ده مع الوقت بيفقع ويشرخ وبساتم متبردة زيادة وبساتم بتنعم بدرجه حرارة مثاليه وهكذا كل جزء في الموتور. وعلي سرعات كبيرة المشكله بتزيد
فدائما من يلغي ثرومستات الكوعه العربيه بتجيب وش سلندر اسرع وبيبقي عنده جلد صباب ودخنه بعد فترة طويله من نزع الثرومستات واستهلاك بنزين اعلي بكتير من الطبيعي الموتور عايز يدفي نفسه مظبوط واحنا منعناه فالحريق مش مظبوط في كل الشمايز جزء مثالي وجزء ابرد من اللازم والحكايه دي بتبان قوووووووووووووي لما تكون شايل الثرومستات وطالع علي الطريق السريع وفاتح علي سرعه تلاقي المؤشر نزل عن الطبيعي وفي بعض الاحيان لو الهوا مقابلك تلاقي المؤشر نزل الشرطه الاولي انت كده بتفرح ان الحرارة واطيه ومفيش خطورة علي الموتور ولو قلتلك ان دي اخطر من ارتفاع الحرارة نفسها او زيها بالظبط. الموتور بيبقي بارد من جزء ومناسب من جزء وعلي الطريق والمؤشر بينزل كده بيبقي مفيش الكفاءة الحراريه الضرورية للموتور. راحت في داهيه وبالتالي عمر الماكينه يقصر واستهلاك غبي للبنزين ملوش داعي. ومفيش سحب حلو نظرا لفقد الحرارة السريع جدا واكتر من اللازم
وسلملي علي الاسطي بليه الفاشل اللي بيفرح لما يبرد الماكنه علي طول وينزل بدرجه حرارته علشان مش قادر يوصل للعيب فبيفتحها علي البحري. واكبر دليل عربيات الخليج وما ادراك ما الخليج ودرجه حرارة الجو هناك طول السنه كلها نازله بمواصفات خليجية وفيها ثرومستات ملوش دعوة يا عم الحج بحرارة الجو برة اللي الاسطي بليه بيقولك اصل في اوروبا الجو عندهم ساقعه وتلج فبيحتاج ثرومستات لكن عندنا الجو جميل او حر فبنشيله احسن انت بقه رد عليه وافحمه دل لو فهم اصلا قولوا طب والخليج وامريكا اللي فيها ولايات جوها احر من الخليح نفسه مركبين الثرومستات ليه طالما عندهم ناااااااااار بالشكل ده حتلاقيه قعد ياكل في صوابعه لانه حااااااااااااااااااافظ مش فااااااااااااااااااهم
مفيش شك لو انت دايما ضارب العربيه صارمة ومبتبصش كل شويه علي مؤشر الحرارة افرض فعلا الثرومستات باظ وقفش وده طبيعي جدا مع الصدا اللي بتعمله ميه الحنفيه. طبعا فدي بتبقي خطورة كبيره علي وش السلندر واول واحد بيدفع الثمن لانه 99% من العربيات من يوم ما اتخلقت ووش السلندر بيتصنع من خامه الاومنيوم المشهورة في عالم المعادن باكتساب الحرارة سريعا وفقدها سريعا شفت الحته اللي فاتت دي باكتساب الحرارة سريعا حط تحتها مليون مليون خط وكمان الاومنيوم اسرع جدا في التمدد والانكماش بدون خطورة. علي الموتور مش زي الشمايز والبلوكه والكرنك. لانه يعتبر معدن طري نسبيا عن بقيه المعادن
الخلاصه خلي عينك كلما امكن علي مؤشر الحرارة دي من واجبات السائق ولو شفت تغيير علي المؤشر سواء بالزيادة او النقصان ده نذير خطير متسكتش وتكبر دماغك. لازم تحل المشكله وفي الاخر احب اقولكم انا اسف للتطويل بس ده واجبي علشان ده تخصصي الدراسي والكلام ده علمي بحت واي شخص من داخل او خارج الجروب عاوز يتناقش فيه علميا انا تحت امره ومش بزهق
وانا بفكر احط الكلام ده بست وكوبي في بوست خاص لوحده علشان الناس كلها تشوفه
والسلام عليكم