ازاى تختار زيت الماتور ؟

Jake Man

زيت الماتور

خاص جروب نوبيرا

أيجيبت
لافرز

بالبلدي كدة عشان انا مش بحب طريقة اللغه العربيه الفصحي
هنشرح الحروف المدرجه علي عبوات الزيت بطريقة مبسطه وسريعه بحسب تصنيف المعهد الامريكي api
هنجد بعد التلات حروف دول
C دة خاص بالديزل او الجاز
S دة خاص بالبنزين
هنتكلم طبعا عن البنزين بعد حرف البنزين بيكون ما يليه حروف اخري بالترتيب الابجدي الانجليزي من الاقل للاعلي كما يلي
Api / sf لا يصلح للنوبيرا
Api / sg لا يصلح للنوبيرا
Api / sh لا يصلح للنوبيرا
Api / sj يصلح للنوبيرا واقصي استخدام ليه 3000 كيلومتر
Api / sl يصلح للنوبيرا واقصي استخدام ليه 5000 كيلومتر
Api / sm يصلح للنوبيرا واقصي استخدام ليه 7000 كيلومتر
Api / sn يصلح للنوبيرا واقصي استخدام ليه 12000 كيلومتر

طبعا أغلب الاعضاء والاخوة المحترمين ف أيجيبت ولافرز هيقولو انت كلامك غلط بخصوص عدد الكيلومترات لانها تصلح للاستخدام اطول من كدة

هقوله موافقك جدا بس لما حضرتك تلتزم بالصيانات الدوريه ف مواعيدها بذات عدد الكيلومتر المفروض تتغير فيه نبقي نلتزم بزيت الماتور

علما بانه من الاساس العلمي لم يثبت ولن نجد اي معهد متخصص زيوت بيقول الزيت كذا بيمشي مسافه كذا

بكدة هنوصل بقي لما بعد الحروف وهيا الارقام

Api / sj 20w50 يصلح للماتور الحاله 0 % ل 60 %
Api / sL 20w50 يصلح للماتور الحاله 60 % ل 70 %
Api / sm 20w50 يصلح للماتور الحاله 70 % ل 80 %
Api / sn 10w40 يصلح للماتور الحاله 80 % ل 95 %
Api / sn 5w40 يصلح للماتور الحاله 95 % ل 99 %
Api / sn 0w30 يصلح للماتور الحاله 99 % ل 100 %

دي طبعا ارقام تقريبيا للتبسيط مش اكتر
طبعا بعض الاخوة ف ايجيبت ولافرز هيقدر يحدد النسب والبعض الاخر لا
تعالي نتكلم بلدي ونوضح ال 6 انواع اللي فوق

اول3 اختيارات من تصنيف ولزوجه خاص بالمواتير الاتيه
عندة تسريب زيت – عندة شمبر – عندة تسليخ شميز – عندة مشاكل نقص زيت غامضه

ال 3 اختيارات الاخيره خاص بالمواتير الاتيه
معندوش تسريب – ولا مشكله شمبر – ولا مشكله تسليخ شميز – والزيت مبينقصش اكتر من 200 جرام ف الغيار ليه بنقول بينقص كدة لان مفيش زيت ملوش بخره محدودة

طب واحد من ايجيبت او لافرز هيقولي بستخدم توتال ولا موبيل ولا تعاون ولا ولا ولا ولا

هنا الرد واضح وبسيط

كل الزيوت الحاليه ف الاسواق تعبئه محليه وتحت رقابه الهيئه التعاونيه للبترول ( التعاون )

يعني لو هتستخدم محلي يبقي تعاون افضلهم واصدقهم

كل الزيوت المستوردة غانيه عن التعريف بس خلينا نقول اني اديب الزيت اللي له منشأ واصل وشهادات خبره وجودة وتجارب علميه اخد عليها شهادات الخبره دي ودول مفيش اكتر منهم

كمثال ( وولفر – اكسادو – ليكومولي – كاسترول ماجنتك – كاسترول أيدج – أمسيول الخ الخ الخ الخ )

طب مسالتش نفسك ليه صوت الكستبانات عندك عالي
دة ناتج من استخدام زيت ردئ ولا يصلح للماتور او لزوجه ف التوقيت من شتاء او صيف غير مناسبه بيؤدي لعدم وصول الزيت لتغذيتها بشكل كامل وبالتالي بتلاقي هيصه وزمبليطه وموسيقي لحن الخلود

هنوصل للنهايه والجزء الاخير وهو اي اضافات مع غيار الزيت
ف ما هو بأيجاز تعتبر مكونات تحسين الاداء من موانع احتكاك لمرممات الخ الخ الخ ولا يزال العلماء هيتوصلو لاضافات اكتر واكتر
وكلها سواء الحاليه او المبتكره مقدما مش هتعمل او تصلح اي خراب ميكانيكي حصل بالفعل داخل الماتور

لكن ينصح باستخدامها للماتور الحاله المتوسطه ف محاوله من حضرتك يا ايجبتاوي او لافرزي للحفاظ علي حاله الماتور كما هو لاطول وقت ممكن واساس الحفاظ علي الحاله دي مش الاضافات بالعكس طريقة سواقه حضرتك والصيانه ونوعيه الزيت ووقت تغيرة عامل اساسي لاطول فترة ممكنه

طب والماتور اللي حالته اعلي كفاءة من كدة يستخدم اي اضافات عادي جدا كلها هتفيدو

يعني بالبلدي معاك تروش ماتورك روش عليه لكن اي كتالوج عربيه لم يرشد باستخدام اي اضافات لغيار الزيت نهائي

وننضح حضراتكم وننهي تماما عدا الفلاش لضررة اكبر من نفعه لانه له تأثير سلبي ع السبيكه بيفكك لزوجه الزيت وبالتالي يزيد من الاحتكاك داخل اجزاء الماتور

في النهايه اتمني اكون بسط الموضوع بقدر المستطاع لكل الاخوة ف جروبنا ايجيبت ولافرز واتمني اي شخص عندة استفسار جديد او غير موضح ف البوست يتفضل

لكني لا اعتقد لان مفيش حاجه مش واضحه البوست سهل وبسيط وان شاء الله يفيد الكل
تقبلو مروري
جاك

التصنيف العالمى للزيوت لل API

لزوجة الزيت الافضل بالنسبة للطقس

افضل مقاس للزيت

جدول تشحيم النوبيرا