طريقة تنظيف طرمبة البنزين

Khaled Kasem

حاجه كده من بعض جمايلكم عليا النهاردة صورتلكم عمليه فك وتنظيف طلمبه البنزين بالصور والخطوات واحده واحده الاول تفك الكنبه اللي ورا نطر لفوق كده حتخرج من الكلبسين البلاستك وبعدين تشيل الموكيته او فرش الارضية الجلد بتاعك حتلاقي غطا اسود قد الطبق كده ببطن ايدك حتضغط عليه بالراحة وتلفه شمال في اتجاه الفك حيطلع معاك وتكون مجهز مفك عاده كبير يستحمل دق الشاكوش وشاكوش صغير وحتحط المفك في حلقه حديد كبيرة قافله ومثبته الطلمبه علي التنك وبرده حتتفك شمال زي الغطا بس دي بقه حنستخدم المفك والشاكوش وحتلف معاك الحلقه واحدة واحدة وتحرر من الطلمبه وبعدين نخرج الطلمبه بالراحة بعد ما ترفعها ننتظر لحظات تصفي البنزين اللي فيها ونشدها في اتجاه الباب الخلفي يمين علشان متكسرش العوامة. وبعدين تاخدها وتغطي التانك بكيس بلاستيك وعليه الغطا الاسود اللي زي الطبق. وتقفل عربيتك كويس وتطلع بيتكم ونبدأ بقه عمليه تنظيف الطلمبه والعوامه 1/ حنفك الفلتر ده بتاع الطلمبه وبيكون موجود في اخر جسم الطلمبه تحت مكان الموتور وبيكون متثبت مع جسم الطلمبه عن طريق كلبسين بلاستك في بدن الطلمبه تسحبهم للخارج ببوز مفك او بايدك وتشد الفلتر لتحت بس. وخد بالك حتلاقي جوان جلد كده بين زور الفلتر والطلمبه خليه معاك علشان ساعه التركيب حيركب تاني كده خرج الفلتر تاخدها تغسله بميه وبريل لحد ما تبقي زي القطنه البيضا وبعدين تتنشف بسشوار سخن او تحطها قد ساعه في الشمس وبعدين نغسل الفلتر بالبنزين علشان نضيع اي اثر للميه نهائي

 

2/ وبعد كده حنيجي للطلمبه نفسها حنلاقي في حاجه زي قطعة شاش كده موجودة مكان نزع الفلتر السابق وقبل تجويف الموتور بتاع الطلمبه مباشرة ببوز ملقاط واسحبها لبرة حتلاقي فيها بلاوي ورمل ورواسب السنين. عايزك تغسلها بنفس طريقة الفلتر السابقه بالظبط ولو اتهرت في ايدك بدلها باي قطعه شاش مناسبة واوعي تهمل تركيبها تاني علشان دي بتحجز بلاوي قبل فتحه الموتور مباشرة بتكون عدت من الفلتر اللي في الصورة دي مكانها في الطلمبه زي ما بيشير السهم

 

ودي صورة الشاشة وانا ماسكها بملقاط عندي

3/وبعدين حنيجي عند العوامة ونخلعها من مكانها بس شوية حرص وبالراحة. يا جماعه حنفك كلبس اسود بلاستيك. حتلاقيه ماسك ذراع العوامة زي الصورة وله شفتين بايتين في جسم الطلمبه حنضغط عليهم للداخل في اتجاه بعض في نفس الوقتمع سحبه سحبه خفيفه للخارج حيطلع معاك الكلبس الاسود في ايدك وبعد كدع حتلاقي كلبسين او مشقبيتين. تانين في جسم الطلمبه نفسها ماسكين دراع العوامة بايدك كده او ببوز مفك زي ما عملنا في الفلتر. اضغط عليهم للخارج عكس اتجاه بعض واسحب دراع العوامةمن دراعها حتخرج معاك العوامة بسهولة

 4/ وبعدين حنمسك دراع العوامة حتلاقي. قطعتين نحاس علي طرف الذراع نجيب بقه حته صنفرة ناعمة وتعيش بقه عايزها تبرق بس بشويش كده علشان رقيقة وبعد كده تحاول ترفعهم لفوق شويه ببوز مفك علشان نحافظ على قيمة وجودة التلامس بين الذراع وبين الشريحة الالكترونية اللي متثبته علي جسم الطلمبة

 

5/نيجي بقه لاهم مرحلة الشريحة الالكترونية ودي بتحتاج شويه سبرتو ابيض واستيكة قلم رصاص تمسك حضرتك الاستيكة وتمسح الشريحة كويس جدا جداااااااااااااااااااااا مرات عديدة وتكب شويه سبرتو لغاية لما التدريج يبدأ يبان ويظهر ويوضح معاك ويبقي لامع ونظيف زي الصورة كده ودي مهمة يا جماعه للي بيشتكي. من عدم دقة المؤشر بتاع البنزين في الطابلوه وبعدين تكون حريص جدا. وانت بتتعامل. مع الشريحة الالكترونية علشان متتكسرش وبعدين تزيل كل آثار هري الاستيكة بالسبرتو واي قطنة نظيفه وتمسحها وبلاش فرشه الاسنان علشان بتجرح الشريحة وتخرف في القراءة بعد كدة وللناس اللي عايزة تغيير الشريحة الالكترونية لو تالفه اصلا انت بتشتريها استيراد مبتعملش 50 جنيه وتوصلها مكانها وتفك عن طريق اربع كلبسات في بدن الطلمبه من الاربع زوايا الشريحة الالكترونية زي الصورة كده وبعدين تلحم السلكين بالمكواه والقصدير. سهلة جدا دي مش فيلم ولا حاجه ولو اللمبة بتاعه البنزين مبتنورش وانت متاكد ان لمبه اللي في الطابلوة سليمه ومش محروقه يبقي الكوز الصغير اللي عليه سهم احمر ده هو المسئؤل عن اضاءة اللمبه لما التنك يفضي وهو عبارة عن كوندنسر وبردة بيتغير لو لقيته استيراد ب10 جنيه تقريبا

 

6/نيجي يا رجالة للي عايز يغير قلب او موتور الطلمبه ودايما ده اللي انا بوصي به يعني لو العوامة سليمة والشريحة الالكترونية !سليمة ومفيش مشكله في مؤشر البنزين في لوحة العدادات. ومشكلتك ان الطلمبة بتاعتك ضعيفه او قاطعه خالص اشتري افضل واكرر افضل موتور طلمبة جديد افضل من الاستيراد لسببين الاول علشان الطلمبه لما تبقي استعملت قبل كده يعني دخل فيها بنزين واشتغلت وبعدين اتفكت من علي التانك واتركنت عند بتوع الاستيراد فترة طويلة بيكون وبيحصل ان الجل العازل او الفازلين الكهربا العازل اللي داخل الموتور نشف واصبح العزل ضعف بين ملفين الموتور الداخليه وبياثر علي عزل وجودة وقوة سحب وضخ الموتور بعد استئناف تشغيل الطلمبة في عربيتك مرة اخري يعني مبتعمرش كتيير انت وحظك وغالبا بتضعف بسرعة جداااااااااااااااااااااا. ودي عن تجربه يطول شرحها لكن الموتور الجديد مبيبقاش دخله بنزين قبل كده وانا بنصح بالموتور الالماني bosh تمنه 300 جنيه بس والله حتركبه وتنساه للابد طالما كهربه عربيتك. سليمةو الريجيريتور بتاع مسطرة الرشاشات الراجع يعني سغال تمام ومش مسدود وعلبه الكانستر عندك -سليمه ومفيش اي حمل او جهد زائد علي الطلمبه. والتوصيلات الكهربيه والفيوز والريليه او الكتاوت بتاع البنزين كله كله سليم

 

7/ اخيرا ده مكان الكليبسات الاربعة الكبار اللي بتفتح الطلمبه لو عايز تغيير الموتور بواحد جديد واعتذر لعدم وضوح زاوية الصورة. بس هما مفيش غيرهم من ناحيه فووق واحنا كل شغلنا السابق كان اسفل الطلمبة وبعدين اخيرا نرجع كل حاجه زي ما كانت واوعي تنسي الجوان الاسود بتاع زور الفلتر فاكرينه وخطوات التركبب عكس خطوات الفك وركب طلمبتك في عربيتك وجرب دقة المؤشر وسحب العربية وابقي ادعيلي ملحوظه صغيرة بس هاااامه واكيد كلكم عارفينها حاول قدر الامكان لا تترك تانك العربية فارغ حتي تضئ لمبه البنزين علي قد ما تقدر ميقلش عن الربع دائما وان اضمن ليك طلمبة بنزين خدمة شاقه لان وجود البنزين اصلا والطلمبة مغمورة فيه كلها باستمرار بيبرد جسم الطلمبه وبيحافظ علي الموتور وبيطول عمرها ناهيك بقه لو مفيش بنزين علي طول وحضرتك بتمشي مشحر بنزين علي طوووول متسألش بقه عن ضعف الطلمبه او انها باظت بعد وقت قليل علشان كفايه عليها الرواسب اللي بتسفها من قعر التنك دائما 

ده شكل الموتور بتاع الطلمبه من الداخل بعد فكه وانصح دائما لو اضطرتك الظروف لشراء موتور استيراد للظروف الماديه هو بيتراواح من 50 الي 100 جنيه حسب حاله الموتور والتاجر اللي بتشتري منه. وانا شخصيا بفضل هذا النوع الاستانلس ستيل افضل من الحديد المجلفن بيبقي شغال كويس قوووووووووووووي بتلاقيه دايما في طلمبات النوبيرا ذات اللون الابيض الشاهق وبدون فلتر خارجي اما طلمبه اللانوس بتبقي لونها زي اللي في الشرح ولها فلتر خارجي زي ما شوفتم معايا النهاردة ولونها بيج غامق وفي الاخر الاتنين كويسسن جدا وبيركبوا علي اللانوس والنوبيرا مفيش فرق جوهري نهائي بيطلعوا نفس البار تقريبا

وتقبلوا دائما تحياتي اخوكم خالد قاسم