الوان دخان العادم ومعرفة حالة المحرك عن طريق لون العادم

Khaled Kasem

بناءة علي طلب الاخ العزيز / محمد حمزة وعلشان رجالة جروبنا العزيز موضوعنا اليوم عن الوان دخان العادم ومعرفة حالة المحرك عن طريق لون العادم واسبابه وطرق العلاج الجذرية والمؤقتة
بسم الله. نبدأ
من الطبيعي ان يكون المحرك لا يصدر اي. دخان عادم ملون يعني انبعاث دخان شفاف لا يري بالعين لكن في بعض الاحيان يخرج العادم ملون يأما باللون الابيض يأما باللون الاسود يأما باللون الرمادي المائل للازرق الخفيف
1/ اللون الابيض …
لو خرج العادم باللون الابيض سواء كثيف او خفيف في اول الدوارة صباحا وخصوصا في ايام الشتاء البارد يكون طبيعي جدا. وده نتيحة احتراق قظرات الماء المتكثفه داخل الشكمان لكن بمجرد وصول المحرك لدرجة حرارة التشغيل المثالية فيختفي نهائيا وممكن قبلها كمان يكون الدخان اختفي تماما وان لم يختفي واستمر الدخان الابيض وحتي ولو كان علي خفيف كدة فده بيدل علي مشكلة وهي وصول مياة التبريد الي غرف الاحتراق بسبب اهتراء جوان وش السلندر او تآكل في قمصان التبريد في الوش نفسه او شرخ في الاسطواتات نفسها (بلوكة الموتور) وعلي ذلك بيحصل تسريب وتفويت جزئي من مياة التبريد ومن مكانها الشرعي (قمصان التبريد) الي غرف الاحتراق ونواتج احتراق الماء مع الهوا والبنزين بيبقي دخااان ابيض مستمر. وحط تحت مستمر كذا خط ولازم يصاحب الحالة دي بالذات نقص مستمر لمياة التبريد في القربة او الريادتير
الكشف الصحيح وطرق العلاج المؤقتة والجذرية :-
يتم الكشف الصحيح باختبار بسيط هو ادارة المحرك وهو بارد علشان نتمكن من فتح قربه الميه والنظر بامعان في القربة لو لقيت فقاقيع هوا كبيرة وسريعة. ونفخ مستمر بمجرد دوران الموتور يبقي خلاص المشكلة زي ما ذكرنا ياما جوان لوحده ياما جوان ووش سلندر يا ما شرخ في البلوكه هنا بقه ملحوظه هامه لازم نفرق بين تقليب طلمبه الميه للماء وده بيعمل نفس الفقاقيع بس بسيطه قوي وتزيد مع زيادة البنزين وتقل مع السلانسيه وخصوصا لو فيه ثرومستات حرارة راكب بيكون لسه قافل الميه عن الريداتير ومحتفظ بيها في الموتور فبترد الميه وتعمل فقاقيع بسيطه قوي في القرب وده طبيعي جدا ودلاله علس سلامة طلمبة الميه لازم نفرق بين الحالتين
طرق العلاج المؤقتة :-
بدون ضحك وسخرية 3 حلول سريعه بس مؤقته تكفي ايام وساعات شهور حسب حجم التسريب 1 وضع فلفل اسود مطحون بس مش ناعم قوي نص طحنه كدة ووضعهم في القربة وتدوير العربيه حتي تصل الي درجه حرارة التشغيل. يعني 15 دقيقه كفايه واطفاء المحرك وتركه يبرد شويه وتغيير مياه التبريد بالكامل
2 - وضع 4او 5 ملاعق بن بنفس الطريقه السابقه وتنفيذ جميع الخطوات
3- وضع بيضه نيه في شويه ميه ورجهم وسكبهم في القربة زي الحالات السابقه والحل ده بقه بالذات انا كنت بضحك عليه دايما لكن صعقت لما شوفته علي الجزيرة الوثائقية ومجود علي النت كمان هههههههههههههههههه
كل دي حلول مؤقته انا اعرف ناس عملتها بس مجربتهاش بنفسي
حلول جذريه :-
تغير جوان وش السلندر والوش نفسه لو لزم والكشف علي البلوكة مظبوط وبعناية وده طبعا بيكون افضل بكتير
الدخان الاسود …
ودة بيبقي خلل في الرشاشات وفي زمن فتح وقفل ابرة الرشاش. ووصول الرشاش لمرحلة التسيييل وضعف كبير في حساس الاوكسجين او تلف في حساس الماب ومصاحب له رائحة بنزين. ني كبيرة ومش محترق ويسلتزم كشف كمبيوتر مخصوص لان التهم كثيرة والمتهمين اكثر علشان حصر العيب وغالبا بيكون حريق مش مظبوط ونسب البنزين والهوا اللي هيا 14.7:1 بتكون مش مظبوطه نهائيا المهم ان الدخان الاسود اقلهم في التكلفة والخطورة. علي حاله الموتور
الدخان الرمادي المائل للازرق……
وده يا جماعه ثانيهم في الخطورة علي المحرك بعد الدخان الابيض من وجهة نظري وبيحدث هذا الدخان لما زيت التزيت بيدخل غرف الاحتراق ويتحرق مع شحنة الهوا والبنزين فبينتج هذا اللون من الدخان ومصاحب دائما لرائحه زيت محترق ذو رائحة كريهه ونفاذة ومصاحب ايضا لفقد كبير في زيت الموتور علي فترات قريبه جدا
ودة ناتج من ضعف اوكسر في شنابر البستم وخصوصا الشنبر الاول بتاع الضغط والحبك لما بيضعف او جدار الاسطوانة من كتر عمر الموتور بيعمل بيضاوي فالشنبر ميحكمش مظبوط علي الاسطوانة فبالتالي يهرب زيت من تحت من عند الكارتيرة الي غرف الحريق وبردة الضغط بتاع غرف الحريق بيهرب الي الكرتيرة وبيحصل نفخ في الكارتيرة من تحت مما يساعد علي تكوين الرغاوي اللي بتققل كفاءة الزيت وتعوق عمليه التزيت فلذلك كل العربيات بتلاقي في معظمها صمام لا رجوعي اسمه صمام تهوية علبه المرفق (الكارتيرة الزيت) pvc valve وعندنا احنا في النوبيرا مش موجود الصمام ده وبدلا منه فيه خرطوم الفايظ بتاع بخر الزيت ومتوصل في نهايه خرطوم عمة الهوا قبل البوابه مباشرة
وايضا من اسباب الدخان الرمادي تلف ونشفان في جلد الصباب مما يفوت زيت ويسرب في غرف الاحتراق لكن بنسب اقل بكتير من تلف الشنبر نظرا لموقعه بعيدا عن تدفق الزيت بغزارة وقوة في الاسفل
طرق العلاج :_
من الاخر كده لو كشفنا علي سن البوجيه ولقيناه نظيف من غير زيت او زيت خفيف جدا او عملنا اختبار كبس لكل سلندر علي حدا وطلعت النتيجة مقبولة يعني حاله المحرك مش اقل من 60% او65% توفيرا للنفقات ووجع الدماغ ومفيش نتيجة حتدووم. نحدد الحالة بالظبط عن طريق ميكانيكي محترف لو جلد صباب اعمله لكن لو شنابر وحتفتح تلاقي كمان عاوز تخرط وتخش في نص عمرة او عمرة وده اكيد وخصوصا لو العربية عاملة عدد كيلوات كتييير وكنت بتقرص عليها دايما يبقي شورت بلوك فورا وحذاري كل الحذر من العمرة في مصر ام الدنيا وان شاء الله حعمل بوست جديد اوضح ليه العمرة عندنا 90% بتفشل فشل ذريع و10% بتنجح سنه او سنتين بالكتير قوووووووووووووي لو بتحسي علي العربية
ومن المسكنات في الحاله دي بتاعه الدخان الرمادي واكلان الزيت المستمر علبه زيت شمبر للاسف مع اني مبحبش الحل ده لانه ساعات بيجيب طلمبة زيت وعن تجربة مع احد الجيران المهم حتطر حضرتك تحد زيت تقيل شويه ويفضل في الحالة دي زيت احادي الدرجة وتجيب ارخص حاجه مصر التعاون وتخلي معاك جركل زيت باستمرار في الشنطة ورا وتراقب من الوقت للتاني منسوب الزيت معاك وكدة مبروك عليك انت الان من اصحاب المواتير الخفيفة او المفوتة زي ما بيقوله هههههههههههههههههه معلش قلت اهذر شويه
المهم تفضل تتعامل مع الموتور علي الحالة دي ومتفتحوش. الا تعمل جلد صباب مش اكتر اوشنبر فقط بدون خراااااااااااطة
لحااااد مايجيب آخرة وهاتلك شورت بلوك انظف بكتيييييير من عك الاسطي بليه
وتقبلوا تحياتي
اخوكم خالد قاسم