دور الارضى فى العربية

Alkady Da Ana (مؤسس الجروب)

اولا: السلام عليكم ورحمة الله وبركاته

ثانيا :
انا هتكلم فى معلومه بسيطه جدااا وسهله
مش عاوزين نعقد الناس ولا نخليهم يحتاروا

هنتكلم النهارده عن دور الارضى فى العربية

ناس كتير ممكن تكون مفكره ان كهربا العربية بتعمتد اساس على الكهربا ( الموجب ) وليس الارضى
وان الارضى مش مؤثر فى اى شىء
لكن الصحيح ان كهربا العربية كلها بتعتمد بشكل اساسى على الارضى فى جميع وظايفها
لان الضفيره كلها متوصله على القطب الموجب
يعنى فرد الكهربا من البطاريه للاى جهاز فى العربية سواء النور او الكاسيت او التكييف
يعنى مفيش اى وصلات فى السكه دايركت من البطاريه عليه

انما الارضى فهو القطب السالب الذى لاتتم اى وظيفه بدون وجوده فى العربية
وهو ارضى واحد فقط معتمد عليه كهربا العربية كلها

لذلك كابل الارضى دا لازم يكون مظبوط جداا ومربوط صح
لان مؤشرات او اعراض عدم ربطه كويس
انك تلاقى المكنه فيها هزه والنور مائل للاصفرار بالنسبه طبعا للنور الامامى
الكاسيت لو مشغل الراديو بتسمع فيها صوت المكنه والاشارات والكلاكس
مكن الازاز بيطلع ابطأ من الاول دا طبعا لو المكن سليم

طيب الحل ايه

بنفك قواطيش البطاريه ونغلى براد شاى على النار ونغسل بيه البطاريه والقواطيش كويس جدا
ولو فى حتت صنفره ناعمه او ليف سلك من بتاع المطبخ نصنفر القواطيش والاقطاب كويس
ونرجع نركب القواطيش
طبعا ياجماعه احنا بنخلع السالب الاول ولما نرجع نركب بنركب الموجب الاول
دا عشان الشرز اللى بيطلع ميأثرش على اى شىء
نربط القواطيش مظبوط نجيب 5 سم زيت موتور فى سرنجه ونحطها على القواطيش
ونمسح الزياده وكدا احنا مـتأكدين 100 % من سلامه القواطيش

طيب فى ناس لما بتبص عندها على القواطيش بتلاقى السلك النحاس عليه طبقه خضار او جنزره بمعنى اصح دا برضه بيضعف التوصيل طيب الحل ايه
بنفك القطاش من على السلك وببنسه نبدأ نلف السلك كله ناحية اليمين مره ونرجع تانى للشمال مره
طيب دا ليه دا كانك بتصنفر السلك بالبنسه
ودا بيديك مؤشر لمدى متانه السلك لان لو السلك مجنزر جامد هتلاقى مره يمين ومره شمال
السلك بيتقطع وبيتفرفت طبعا انا اقصد شعر النحاس
ساعتها بسكينه حاميه او قطع عرى حته جديده من السلك وقص القديم المجنزر دا وركب تانى القطاش على السلك واربط عليه كويس جداا

وكابل الارضى لو كانت مجنزر ممكن تجيب حته نص متر 12 ملى تبقا حاجه محترمه وتعملها ارضى

طيب فى ناس بتشتكى من ضعف بعض الحاجات فى العربية
يعنى مثلا مكن الازاز او النور الامامى مصفر رغم انه عمل القواطيش كويس وشحن الدينامو مظبووط

ممكن تعمل ارضى تقوية من البطاريه مباشر للجهاز اللى انت عاوز تقويه مقدرش اقولك بيعمل فرق قد ايه فى الاداء فرق يعادل 180درجه

وكدا بنكون وضحنا اهميه الارضى فى العربية
واتمنى من الله ان اكون وفقت فى عرض وجهة نظرى وتحت امركم فى اى استفسار او نقاش